巴塞隆拿上場西甲以3比1擊敗貝迪斯，創出今季聯賽主場19戰全勝壯舉，但卻付出沉重代價，中場主將費明盧比斯不幸受傷，需要接受手術，預料休戰4至8星期，相信無緣為西班牙出戰今屆世界盃決賽周。

費明盧比斯該仗踢完上半場退下火線，經過檢查之後，發現呢位23歲新星嘅右腳蹠骨有骨折情況，需要開刀治療，未來1至2個月唔可以參加比賽。距離世界盃揭幕只剩下大約3星期，恐怕佢趕唔切復出參賽，西班牙領隊富安迪亦唔會冒險揀選1位剛遭遇重傷嘅球員入伍。

費明盧比斯今季為巴塞隆拿各項賽事上陣48場入13球及17次助攻，傳射能力都非常出色，西班牙缺少呢位新星助陣，難免削弱中前場進攻人腳實力。

另外，巴塞隆拿宣布同教練費歷克續約至2028年6月，並有權再延長多1年合約，呢位61歲德國名帥執教巴塞隆拿2季都奪得西甲冠軍。

足球博彩神器，每日重心提供盡在《彩報》：http://win.on.cc/football/